桃花运(福州语微小说)

桃花运(福州语微小说)

记礼有蜀回去石竹山客遛

看见蜀间庙礼点礼真侈香烛

蜀隻有六七十岁其道士坐裡势

胡须长长，目睭半䀫

就像一切伊都八

一切都着伊掌握之中

逢款

我有蜀隻朋友真爱看命

伊抽啰蜀签，讲野准啊

汝也来抽蜀签吧

因为当时我失恋去

我真喜欢其蜀隻诸娘囝

共我分手去

伊嫌我厝无钱侬复恰平直

就共蜀隻比伊大十岁其

有钱男界结婚去

只件事计产生其后果

就是我变真自卑去

因为我厝礼真逼啊

固蜀下就是我对爱情

有免疫力去

不敢随便爱上蜀隻侬

更无敢付出所有其感情

因为就像蜀条歌裡势唱其逢款

伤心其都是我

但是我对爱情固是有盼望其

盼望有诸娘囝会主动爱上我

就像七仙女爱董永

白娘子爱许仙逢款

所以我也罔抽啰蜀签

其中有蜀句是总款写其

我遘现在固记真深一一

阵阵桃香洒满爵

飒飒风声落花情

仱道士就共我解释

大概其意思就是

我兹隻侬桃花真旺

伓使惊无侬喜欢我

虽然我对总款乇儥相信

但是固是见觉讲野着

因为生活台中，确实

都有诸娘囝女界喜欢我

但是因为我已经对爱情

有免疫力

所以也无发生什乇事计

仱真快我其桃花就来啰

有蜀日同事告我

骑骹踏车去连江客遛

齐来其有七八隻侬

有男有女，都是山地车爱好者

其中同事其蜀隻朋友

看见我就真热情

主动共我攀讲

伊会八我着

《三山》编辑部礼工作

就加啰我其电话

过几工就躃我编辑部来

掏几条诗乞我看

仱复我攀讲，会讲真行

我都乞伊做急去

我讲我固有事计

仱伊嘴乍铆去

但是我见觉诗固写也无呆

所以就将伊发表出去

仱伊讲卜请我食酒

食酒辰候伊不时

伊手硩我肩头，摸我手臂

有其辰候固暗暗摸我手指

我见觉真儥舒畅

就共我同事讲这事计

想儥遘伊两隻大冤家去

原来伊两隻是：gay

这写诗朋友喜欢我

我同事认为伊是：见异思迁

汝看总款忤聊闷其桃花运

都乞我碰着，汝讲会笑儥

有蜀部电视剧号礼

《不要和陌生人说话》

我只回其经验我总结囇

就是伓通共恰热情其侬讲话

伊溪势对汝只热情噜

肯定有目的啊

复蜀日我爸乞我讲

我小学同学

号礼依琴其诸娘囝

我会记其儥

我讲有仂囝印象

我爸讲伊爸真中意我

希望我共伊见蜀面

侬讲女大十八变

我看见依琴辰候

发现伊漂亮遘

我都儥认识去

依琴也真中意我

所以真快我共伊就结婚去

嚽是我真正其桃花运

过几年我伲囝都上幼儿园唠

早头依琴送，下昼我接

有蜀日我楼上其蜀隻女界

伊讲今旦伊有事计

希望我帮伊接囇伲囝

我会八儥丈夫去深圳工作

厝礼也无老侬对手

所以就讲，会使，无事计

仱遘暝晡伊来看见

两隻伲囝客遛蜀堆真欢喜

固买礼饼干掏乞我伲囝食

以后伊稠稠都会带礼伲囝

来我厝客遛

伊是蜀隻小学先生

伊看见我厝礼书真侈

就讲借两本乞伊看

我会记礼有蜀本是《红与黑》

仱伊稠稠共我攀讲

但是我见觉伊对书

无什乇兴趣

就是爱碎喘

有蜀日落班辰候

伊讲伊煤气灶火拍儥着去

告我乞伊修理囇

我讲汝先转去

我两下就来

我裡门辰候

我看见伊俪颂礼

卫生衣卫生裤

身体曲线尽啰明显

就像无颂衣裳逢款

过性感去

我目睭乞弹都卜青盲去

我赶紧头覆下

我使砂纸将拍火花其地方

使力搓搓几下

煤气灶就点着去

我讲兹只地方生鉎去

伊讲起动起动食茶食茶

我讲厝礼固有事计

我着转去

过无偌行

伊就离开三山去深圳

伊丈夫着深圳买礼厝

伊也去深圳做先生

特意固躃来共我告别

溪势会讲这事计哩

就是有蜀回我共依琴冤家

伊讲目睭青盲乍会讨我

固讲当时嘻隻先生日日讨我

伊都希望嘻隻女界将我勾去

我乍见觉伊对我有仂囝意思

因为伊丈夫无着伊身边

并且时间嘻满行

伊侬寂寞伊对别隻男界

有想法，也真正常啊

我突然见觉真退悔

溪势我当时都无发现哩

伊侬也生真俊

面做圆圆喏，戴礼眼镜

就是，我突然会八

溪势我始终将伊当成

普通朋友其原因

就是伊汉码真悬，比我悬蜀头

所以，也就是讲

做为男界我固是喜欢

会让我产生保护欲其诸娘囝

譬如像杨钰莹逢款

汝看讨对象

女界都是喜欢讨比伊悬其

有依靠啊

男界相反

希望诸娘囝会偎伊身兜

只回也是真其桃花运

就是我自家都无感觉

桃花就总款飘去

以后着总结经验

把握机会啊

仱最近我发现明显有桃花运

就是我发现手机直透响

有真侈电话拍裡来

有理财其有做股票其

我蜀看就八

嚽是骗子光棍其电话

但是也有小姐其短信

裡势其文字我都无敢写出来

看礼面会红

我做遘手机掏礼

手会战战礼止

因为我未过几分钟

总款其骚扰电话复裡来

我都做真烦恼去

都讲有事计问百度啊

我就去网上去讨

蒋样拦截总款其电话

因为只回

我乞骗子小姐都爱上去

原来手机裡势就有总款功能

仱我就将伊是蜀只拉黑去

来蜀只拉蜀只

仱有闲拍开电话簿辰候

就发现红红其拦截电话

有六七只甚至十几只

就像我巴掌拍风蚊

拍遘蜀手都是血逢款

真有成就感

我想只回

我将桃花全部都接着唠